Heim flag

Hálfmaraþon

Það var í Miðnæturhlaupi Suzuki 2012 sem þátttakendum stóð í fyrsta sinn til boða að taka þátt í hálfmaraþoni. Þá tóku þátt 159 hlauparar af 1.990 sem skráðu sig í einhverja af vegalengdunum þremur sem í boði voru. Hálfmaraþon er 21,1 km langt.

Þátttakendur

Allir sem náð hafa 15 ára aldri geta skráð sig og tekið þátt í hálfmaraþoni Miðnæturhlaups Suzuki. Ekki er mælt með því að óvanir hlauparar taki þátt í þessari vegalengd enda ekki á allra færi að hlaupa rúman 21 kílómeter. Athugið að tímamörk í hlaupinu eru 3 klukkustundir.

Skráning 

Skráning í hálfmaraþonið fer fram á vef Reykjavíkurmaraþons, marathon.is, en einnig er hægt að skrá sig á hlaupdag í Laugardalshöllinni. Athugið þó að verð er hærra á hlaupdag en í netskráningu. Smellið hér til að fá nánari upplýsingar um skráningu í Miðnæturhlaup Suzuki 2016. 

Leiðin

Hlaupin er bæði skemmtileg og krefjandi leið. Hlaupið hefst á Engjavegi í Laugardalnum en eftir það er að mestu hlaupið á stígum. Þegar hlauparar koma úr Laugardalnum hlaupa þeir í gegnum hið rótgróna hverfi Vogahverfi, eftir Gnoðarvogi. Því næst er hladið yfir Miklubrautina og yfir í Elliðaárdalinn. Hlaupið er meðfram Elliðaánum alla leið upp Elliðaárdalinn og framhjá svæði Fáks í Víðidal. Þaðan er farið upp að Rauðavatni og Morgunblaðshúsinu og leggja hlauparar leið sína í gegnum golfvöllinn Grafarholtsvöll. Úr Grafarholtinu halda hlauparar niður Grafarvoginn, í gegnum bryggjuhverfið í Grafarvogi og fara svo svipaða leið og þeir komu aftur inn í Laugardalinn þar sem hlaupinu lýkur.

Hlaupaleiðin er mæld samkvæmt stöðlum AIMS (alþjóðleg samtök hlaupa) og viðurkennd af Frjálsíþróttasambandi Íslands.

Smelltu hér til að skoða kort af leiðinni. 

Drykkjarstöðvar

Þátttakendum í hálfmaraþoni gefst kostur á að svala þorstanum á 5 km fresti og þegar komið er í mark eru þeir því á fjórðu drykkjarstöðinni. Það er Vífilfell sem býður þátttakendum Powerade drykki og vatn. Smelltu hér til að kynna þér nánar staðsetningar drykkjarstöðvanna.

Salernisaðstaða

Þátttakendur í Miðnæturhlaupi Suzuki geta komist á salerni í Laugardalshöll en einnig eru færanleg salerni/kamrar á marksvæði fyrir aftan Skautahöllina, við stífluna í Elliðaárdal (eftir u.þ.b. 5 km) og á golfvellinum í Grafarholti (eftir u.þ.b. 11 km).

Verðlaun 

Í skráningarferlinu hafa þátttakendur í Miðnæturhlaupi Suzuki 2016 val um hvort þeir vilja fá afhendan verðlaunapening þegar þeir koma í mark eða ekki. Öllum stendur því til boða að fá verðlaun. Í hálfmaraþoni verða veitt verðlaun fyrir 1.-3. sæti karla og kvenna auk þess sem verðlaun verða veitt fyrir 1. sæti karla og kvenna í aldursflokkum. Smelltu hér til að kynna þér nánar hvaða verðlaun eru í boði í Miðnæturhlaupi Suzuki 2016.

Tímataka

Tímataka er í hálfmaraþoninu og til að fá skráðan tíma þurfa þátttakendur að hafa tímatökuflögu fasta í skóreimum sínum. Smelltu hér til að fá nánari upplýsingar um tímatöku.


Sendu okkur póst á This email address is being protected from spambots. You need JavaScript enabled to view it.  ef þig vantar nánari upplýsingar um hálfmaraþonið í Miðnæturhlaupi Suzuki.

Um Reykjavíkurmaraþon

Reykjavíkurmaraþon var stofnað árið 1984.  Frá 2003 hefur Reykjavíkurmaraþon verið í umsjón Íþróttabandalags Reykjavíkur (ÍBR) sem eru samtök íþróttafélaganna í Reykjavík.  Á vegum Reykjavíkurmaraþons eru árlega haldin þrjú hlaup: Reykjavíkurmaraþon Íslandsbanka, Laugavegurinn - Ultra Maraþon og Miðnæturhlaup Suzuki. Reykjavíkurmaraþon fagnaði 30 ára afmæli árið 2013.