Heim flag

Umfang framkvæmdar

Kostnaður við framkvæmd Laugavegshlaups er umtalsverður og kostnaðarliðir eru margir. Þrátt fyrir góða samvinnu við marga aðila sem annaðhvort leggja til tæki eða vörur eða gefa vinnuframlag sitt, fellur alltaf til ákveðinn kostnaður sem ekki er komist hjá.

Hlaupið hefur stækkaði á skömmum tíma úr 100 þátttakendum í 500 og útheimtir það umtalsverða aukningu í kostnaði. Til dæmis rúmar samkomuhús í Húsadal ekki nema um 70 manns. Eftir hlaupið 2006, en þá var vitlaust veður, var fyrirséð að gamla umgjörðin í Húsadal væri ekki lengur boðleg. Síðan þá hefur verið sett upp tjaldborg í Húsadal þar sem aðstaða er fyrir alla þátttakendur til að skipta um föt, borða, hvíla sig og njóta samvista. Í Húsadal eru 40 starfsmenn á hlaupdegi, þar af 6 heilbrigðisstarfsmenn, sem þjónusta þátttakendur. 

Flytja þarf klósettgáma í Hrauneyjar og í Landmannalaugar vegna álags þegar mörg hundruð manns þurfa að komast á salerni áður en lagt er af stað. Ákveðið leyfi er fengið frá Ferðafélagi Íslands og Umhverfisstofnun með því skilyrði að ekkert rusl sjáist á leiðinni.

Það liggur mikil vinna og kostnaður í flutningi og umsjón á farangri í Landmannlaugar, Bláfjallakvísl, Húsadal og til baka. Í Húsadal vinna starfsmenn hlaupsins frá fimmtudegi til sunnudags við undirbúning og síðan frágang. Meðal annars við að setja upp tjöld, sturtuaðstöðu, sjúkraþjónustu, mataraðstöðu, tímatöku og tölvubúnað og búningsaðstöðu. Það eru 40 starfsmenn á hlaupaleiðinni til þjónustu við hlaupara, þar á meðal björgunarsveitafólk með 5 fjallabíla. Það þarf að flytja vatn og mat á drykkjarstöðvar. Það er t.d. ekki hægt að gera ráð fyrir að nægt vatn sé í Hrafntinnuskeri fyrir þátttakendur og flytja hefur þurft vatn þangað. Flytja þarf starfsmenn á þjónustustöðvar og þátttakendur sem ekki ná tímamörkum eða slasast til byggða.

Ómæld vinna liggur einnig í óvissuþáttum með veður, ástand leiðarinnar, vatnsmagn í ám og hvernig þátttakendur eru undirbúnir. Það síðastnefnda á helst við um erlenda þátttakendur sem þekkja ekki  íslensk tilbrigði í veðri. Kostnaður er einnig við skrifstofuhald, skráningu, upplýsingagjöf, afhendingu hlaupagagna og aðra þjónustu sem veitt er.

Við erum þakklát samstarfsaðilum okkar sem koma til móts við okkur með ýmsum hætti. Laugavegshlaupið er mikið og kostnaðarsamt ævintýri sem enn er rekið að mörgu leyti af hugsjón þar sem við búum ennþá að því að margir sem að því koma eru tilbúnir ár eftir ár að vinna með okkur við að þjónusta hlaupara á háanna sumarfrístíma í stað þess að vera á fjöllum sjálfir með sínu fólki. Það er ekki hægt að reikna það til kostnaðar í krónum. Það hefur ekki þurft að minna þátttakendur á að þakka starfsmönnum fyrir góða þjónustu, þeir hafa kunnað að meta hana og hafa sérstaklega haft orð á því, sem er skemmtilegt, af því oft gleymist að tala um það sem vel er gert.

Það gefur auga leið að hlaupið verður að standa undir sér og mikilvægustu þættirnir í því eru tekjur af þátttökugjöldum og ráðdeild í rekstri varðandi kostnað.

2015-andri-friskirfloamenn

Um Reykjavíkurmaraþon

Reykjavíkurmaraþon var stofnað árið 1984.  Frá 2003 hefur Reykjavíkurmaraþon verið í umsjón Íþróttabandalags Reykjavíkur (ÍBR) sem eru samtök íþróttafélaganna í Reykjavík.  Á vegum Reykjavíkurmaraþons eru árlega haldin þrjú hlaup: Reykjavíkurmaraþon Íslandsbanka, Laugavegurinn - Ultra Maraþon og Miðnæturhlaup Suzuki. Reykjavíkurmaraþon fagnaði 30 ára afmæli árið 2013.