Heim flag

Þorbergur og Young sigruðu Laugavegshlaupið 2017

Sigurvegarar Laugavegshlaupsins 2017 eru þau Þorbergur Ingi Jónsson og Arden Young frá Kanada. Töluvert mikill vindur var á móti hlaupurunum á leiðinni í dag sem gerði mörgum erfitt fyrir en að öðru leiti góðar aðstæður.

Fyrstu þrír karlar:

1. Þorbergur Ingi Jónsson, Ísland 4:13:25
2. Germain Grangier, Frakkland, 4:22:17
3. Benoit Branger, Frakkland, 4:44:15

Tími Þorbergs er þriðji besti tíminn sem náðst hefur í hlaupinu í karlaflokki frá upphafi en hann á sjálfur besta og næst besta tímann. Þetta var fjórði sigur Þorbergs í Laugavegshlaupinu og jafnframt í fjórða sinn sem hann tekur þátt. Þorbergur og Germain hlupu saman stóran hluta leiðarinnar en Þorbergur fór framúr eftir um 40 km og hélt forystunni til enda.

Fyrstu þrjár konur:

1. Arden Young, Kanada, 5:12:01
2. Elísabet Margeirsdóttir, Ísland, 5:28:15
3. Stina Höglund, Svíþjóð, 5:37:42

Arden Young kom í mark á þriðja besta tíma sem náðst hefur í kvennaflokki. Elísabet Margeirsdóttir sem var í 2.sæti og fyrsta íslenska konan í mark var að hlaupa sitt 8. Laugavegshlaup og bætti besta tímann sinn um tæpar 6 mínútur. 

Smelltu hér til að skoða heildrúrslit og hér til að skoða myndir.

1-karl-kona

Metfjöldi hleypur Laugaveginn

Laugavegshlaupið fer fram í 21. sinn laugardaginn 15.júlí 2017. Alls eru 512 hlauparar skráðir til keppni, 179 konur og 333 karlar. Aldrei hafa fleiri verið skráðir til þátttöku í Laugavegshlaupinu en nú. Íslenskir þátttakendur eru 249 talsins og frá öðrum löndum 263. Fjölmennastir erlendu gestanna eru Bandaríkjamenn en þeir eru 87 skráðir, þá Bretar sem eru 25 talsins og þriðja fjölmennasta þjóðin eru Þjóðverjar sem eru 24 skráðir til þátttöku. Þátttakendur í hlaupinu eru af 32 mismunandi þjóðernum.

Hlaupið hefst í Landmannlaugum kl.9:00 og lýkur í Húsadal í Þórsmörk. Eins og margir vita er Laugavegurinn ein fjölfarnasta og vinsælasta gönguleiðin um íslensk öræfi. Venjan er að ganga leiðina á fjórum dögum en met hlauptími á þessari 55 km leið í Laugavegshlaupi er 3 klukkustundir og 59 mínútur í karlaflokki og 5 klukkustundir í kvennaflokki. Tímamörk eru í hlaupinu og þurfa hlauparar að vera komnir í Álftavatn (22 km) á innan við 4 klst og í Emstrur (34 km) á innan við 6 klst. Það er því aðeins fyrir vel æfða hlaupara að taka þátt í þessari miklu þolraun.

Rúta á vegum Kynnisferða býður uppá ferðir yfir Krossá í tengslum við Laugavegshlaupið. Rútan fer frá afleggjaranum í Húsadal laugardaginn 15.júli á hálftíma fresti milli kl.12:00 og 15:00. Að hlaupi loknu fer rútan til baka kl. 17:30, 18:00 og 20:40. Gjaldið er 1.000 kr. fyrir ferð, 500 kr fyrir 12-15 ára en frítt fyrir 11 ára og yngri (fædd 2006). Ekki þarf að bóka í þessar ferðir fyrirfram og er gjaldið greitt á staðnum. Einnig er hægt að kaupa rútuferðir frá Seljalandsfossi og Hvolsvelli inn í Húsadal og til baka hjá Kynnisferðum. Slíkar ferðir gætu hentað áhorfendum sem ekki treysta sér eða sínu farartæki til að keyra malarveginn inn í Þórsmörk. Tímasetningar á ferðum Kynnisferða til og frá Þórsmörk og verð má finna hér á heimasíðu Kynnisferða.

Fregnir af fyrstu hlaupurum verða birtar á Facebook síðu hlaupsins um leið og þær liggja fyrir. Heildarúrslit verða birt hér á marathon.is að hlaupi loknu eða um kl.18.

Nánari upplýsingar:

Dagskrá hlaupdags
Nafnalisti þátttakenda
Rútuferðir
Facebook
Instagram

Andri-lv-1066 copy

Uppfærð veðurspá

Veðurvaktin hefur sent okkur uppfærða veðurspá fyrir hlaupaleiðina á morgun. Breytingar frá í gær eru einkum þær að skúrir eða rigning verður allt frá upphafi hlaups og eins er nú spáð lítið eitt ákveðnari SV-átt sem lengst af verður mótvindur á hlaupaleiðinni. Þetta er þó alls ekki vont veður eða verulega óhagstætt segir veðurfræðingur. Smellið hér til að skoða spána á korti.

vedurspa-2017-7-14

Veðurspá

Veðurvaktin hefur gert veðurspá fyrir Laugavegshlaupið 2017 og er von á uppfærðri spá frá þeim aftur á morgun.

Samkvæmt spá Veðurvaktarinnar lítur út fyrir sunnangolu, skáhalt á móti til að byrja með og allt að 8 m/s í Hrafntinnuskeri. Markvert hægari vindur þegar komið verður neðar en þá suðvestlægari lengst af frekar á móti á hlaupaleiðinni. Þurrt verður í Landmannalaugum, en með aukinni hæð verður dálítil rigning. Skúraleiðingar þegar neðar dregur og að mestu skýjað, þó sólarglennur séu ekki útilokaðar. Smelltu hér til að skoða veðurspána á korti.

Veður á þessu svæði er síbreytilegt og því mikilvægt að allir hafi tiltækan þann klæðnað sem áður var búið að ráðleggja. Einnig er mikilvægt að hlauparar láti tösku með hlýjum fatnaði til að klæðast eftir hlaup í rútu hlaupsins í Landamannalaugum sem verður flutt inní Þórsmörk og þeir finna í farangurstjaldi á marksvæði. Sjá nánar um farangur hér.

Rétt er að ítreka að þó að drykkjarstöðvar séu á leiðinni er nauðsynlegt að hver og einn hlaupari hafi meðferðis drykkjarbrúsa og orkugel eða aðra næringu. Til að losna við klístur og rusl sem fylgir gelbréfum er ráðlagt að setja innihald gelbréfanna í brúsa. Það hefur reynst hlaupurum vel að fá sér einn og einn sopa af geli alla leiðina. Auk þess hefur reynst vel að hafa meðferðis salttöflur eða eina teskeið af salti í plastpoka sem hægt er að fá sér nokkur korn af og skola niður með vatni. Drykkjarstöðvar á hlaupaleiðinni eru í Hrafntinnuskeri, við Álftavatn, á söndum við innri Emstruá, í Emstrum, við Ljósá og við Þröngá.

Óheimilt er með öllu að kasta rusli frá sér á leiðinni. Hvetjum alla til að leggja sitt að mörkum við að skilja við hlaupaleiðina eins og enginn hafi farið þar um. Hver og einn þarf að passa uppá að missa ekki frá sér sín gelbréf og drykkjarmál og aðrar umbúðir utan af mat, plástrum o.fl. Hægt er að losa sig við rusl á drykkjarstöðvum og á marksvæðinu í Þórsmörk.

vedurspa-2017-7-13

Afhending hlaupagagna

Hlaupagögn fyrir Laugavegshlaupið 2017 verða afhend í Laugardalshöll fimmtudaginn 13.júlí milli kl.12 og 17 og föstudaginn 14.júlí milli kl.9 og 17.

Við afhendingu gagna þarf að framvísa persónuskilríkjum og undirrita skilmála. Meðal annars er verið að undirrita samþykki fyrir því að hafa kynnt sér reglur hlaupsins og því mikilvægt að þátttakendur lesi þær hér á vefnum. Þau sem ekki komast til að veita gögnum sínum móttöku og senda fulltrúa í sinn stað þurfa að prenta út og skrifa undir skilmálana sem má finna hér.

2015-number-pickup

Ráshópar 2017

Þátttakendum í Laugavegshlaupinu 2017 hefur verið raðað í fjóra ráshópa. Hóparnir verða ræstir með fimm mínútna millibili til að minnka troðning í upphafi hlaups í Landmannalaugum og til þess að sem réttastur tími fáist hjá þátttakendum. Reynt var að taka tillit til óska um hlaupafélaga eins og hægt var.

Smelltu á heiti ráshópana til að skoða nöfn hlaupara.

Gulur hópur - ræstur kl. 9:00 (uppröðun hefst kl.8:45)

Rauður hópur - ræstur kl. 9:05 (uppröðun hefst kl.8:50)

Grænn hópur - ræstur kl. 9:10 (uppröðun hefst kl.8:55)

Blár hópur - ræstur kl. 9:15 (uppröðun hefst kl.9:00)

Vinsamlega athugið að allir hlauparar þurfa að vera með númerið að framan í mittishæð eða ofar. Flipi af númerinu verður rifinn af við inngöngu í hvert ráshólf í Landmannalaugum. Einnig verður flipi rifin af vegna öryggistalningar í Emstum og Álftavatni og vegna tímatöku í Þórsmörk.

landmannalaugar

Nauðsynlegur búnaður

Helstu fregnir af Laugaveginum eru þær að búið er að opna leiðina og göngufólk er farið af stað. Alltaf er óvissa með veður sem getur haft áhrif á vatnavexti og snjóalög. Snjór er nú samfelldur í um 3-4 km radíus í kringum Hrafntinnusker. Við vitum að íslenskt veðurfar er ansi óútreiknanlegt og því biðjum við ykkur að undirbúa ykkur vel og hafa tiltækan vetrarhlaupaklæðnað.

Á meðfylgjandi mynd má sjá hvaða búnað allir hlauparar ættu að hafa tiltækan á hlaupdag. Langerma bolur og síðar buxur, jakki, vettlingar og höfuðbúnaður sem hylur bæði höfuð og eyru er nauðsynlegur lágmarksbúnaður. Þá eru grófbotna skór og sokkar sem þola að blotna alltaf besti kosturinn. Reynslan hefur sýnt að hlaupurum þykir gott að nota lágar skóhlífar til að varna því að snjór og smásteinar fari ofan í skóna (sjá dæmi um slíka hlíf hér).

Þau sem ætla að skilja eftir tösku hjá okkur sem flutt verður í Bláfjallakvísl ættu að kynna sér vel stærðartakmarkanir á henni hér á heimasíðunni.

Hlauparar sem taka þátt í 21.Laugavegshlaupinu laugardaginn 15.júlí eru hvattir til lesa vel yfir upplýsingahefti hlaupsins til að tryggja snuðrulausa framkvæmd og góða upplifun. Smelltu hér til að sækja upplýsingaheftið (pdf skjal).

Eftir helgi verða birtar upplýsingar um hverjir eru í hvaða ráshóp og á fimmtudag verður gefin út ítarlega veðurspá fyrir hlaupaleiðina. Hvetjum skráða þátttakendur til að fylgjast vel með tölvupóstinum sínum en allir upplýsingapóstar eru sendir frá netfanginu This email address is being protected from spambots. You need JavaScript enabled to view it. .

Jona-skyringarmynd ENK-ISL web

Um Reykjavíkurmaraþon

Reykjavíkurmaraþon var stofnað árið 1984.  Frá 2003 hefur Reykjavíkurmaraþon verið í umsjón Íþróttabandalags Reykjavíkur (ÍBR) sem eru samtök íþróttafélaganna í Reykjavík.  Á vegum Reykjavíkurmaraþons eru árlega haldin þrjú hlaup: Reykjavíkurmaraþon Íslandsbanka, Laugavegurinn - Ultra Maraþon og Miðnæturhlaup Suzuki. Reykjavíkurmaraþon fagnaði 30 ára afmæli árið 2013.