Heim flag

Ráshópar og hlaupanúmer

lv-rasnumer-2017Það er mikilvægt að allir þátttakendur leggi sitt af mörkum til að þessi öryggistalning verði rétt og gefi sig fram í upphafi hlaups í viðeigandi ráshóp og fari síðan í gegnum þar til gert „talningarhlið“ í Álftavatni og Emstrum.

Þátttakendum í Laugavegshlaupinu er raðað í ráshópa eftir áætluðum lokatíma þeirra. Þátttakendur fá mismunandi lit á hlaupanúmerum, sem gefur til kynna í hvaða ráshóp viðkomandi er.

Hóparnir eru fjórir: gulur, rauður, grænn og blár. Fimm mínútur verða á milli ráshópa. Þetta er gert vegna þrengsla í upphafi hlaups og til að varna því að tíminn líði án þess að hlauparar komist af stað. Með þessu fyrirkomulagi verður nákvæmari tímasetning við ráslínuna og leiðin greiðfærari í byrjun á þröngum stíg í upphafi hlaups og á þjónustustöðum á leiðinni. Þetta getur líka orðið til þess að fyrsti þátttakandi í mark sé ekki sigurvegarinn. Það kemur ekki í ljós fyrr en 5-10 mín. síðar.

Með þátttökunúmeri fylgja áfastir tveir farangursmiðar með sama númeri. Þeir eru ætlaðir til þess að rífa frá númerinu og merkja farangur. Sjá nánar um farangur hér.

Á númerinu eru fjórar aðrar afrifur sem tilheyra öryggisferli og tímatöku. Til þess að auðvelda starfsmönnum þjónustu við þátttakendur er nauðsynlegt að númerið sé fest að framan í mittishæð eða ofar. Fyrsta afrifa verður rifinn af númeri í Landmannalaugum, til þess að vita nákvæmlega hverjir fara af stað þaðan. Miðar merktir Emstrum og Álftavatn verða rifnir af þar til þess að geta fylgst með að allir skili sér örugglega alla leið. Síðasta afrifa tilheyrir tímatöku og er rifinn af í Þórsmörk. Starfsmenn sem annast tímatöku rífa hann af þegar hlaupari kemur í mark að loknu hlaupi. Ef miðinn losnar er æskilegt að næla hann fastan við númerið.

Til þess að geta raðað sem best í ráshópa er mikilvægt að þátttakendur gefi upp fyrri tíma og reynslu í hlaupi ásamt áætluðum lokatíma. Upplýsingar um árangur í maraþoni og fyrri Laugavegshlaupum þarf að gefa upp þegar skráð er í hlaupið. Áætlaðan lokatíma þarf að skrá á mínum síðum en sú skráning hefst í lok júní og lýkur 2.júlí. Þar er líka hægt að óska eftir því að vera í ráshóp með ákveðnum hlaupafélögum en athugið að ósk um slíkt þarf að koma frá báðum aðilum. Einnig er hægt að senda tölvupóst á This email address is being protected from spambots. You need JavaScript enabled to view it.  með upplýsingum um reynslu sem gæti haft áhrif á röðun í ráshópa.

Um Reykjavíkurmaraþon

Reykjavíkurmaraþon var stofnað árið 1984.  Frá 2003 hefur Reykjavíkurmaraþon verið í umsjón Íþróttabandalags Reykjavíkur (ÍBR) sem eru samtök íþróttafélaganna í Reykjavík.  Á vegum Reykjavíkurmaraþons eru árlega haldin þrjú hlaup: Reykjavíkurmaraþon Íslandsbanka, Laugavegurinn - Ultra Maraþon og Miðnæturhlaup Suzuki. Reykjavíkurmaraþon fagnaði 30 ára afmæli árið 2013.