Heim flag

Reglur 2017

Reglur Reykjavíkurmaraþons eru settar fram sem rammi utan um framkvæmd hlaupsins: Miðnæturhlaup Suzuki, með það að markmiði að hlaupið gangi sem best fyrir sig og að sem flestir njóti þess að taka þátt.

Í Miðnæturhlaupi Suzuki gilda reglur alþjóðafrjálsíþróttasambandsins IAAF um götuhlaup sem sjá má hjá www.fri.is. Til viðbótar við þær reglur gilda einnig eftirfarandi reglur Reykjavíkurmaraþons.

  1. Þátttakendur bera sjálfir ábyrgð á að kynna sér þær reglur sem gilda um þátttöku í Miðnæturhlaupi Suzuki og fylgja þeim eftir í einu og öllu. Brot á reglum geta ógilt þátttöku í hlaupinu.
  2. Allir þátttakendur sem skrá sig í Miðnæturhlaupi Suzuki eru á eigin ábyrgð. Börn eru á ábyrgð foreldra. Hlaupabrautin er ekki alveg lokuð umferð og því mikilvægt að sýna aðgát. Allir þátttakendur eru beðnir að kynna sér skipulag á marksvæði. (Sjá nánar hér).
  3. Þátttakendur skulu hefja hlaupið á auglýstum tíma. Tímatökukerfið er eingöngu virkt á þeim tíma. (Sjá nánar hér).
  4. Tímatöku lýkur þremur klukkustundum eftir að hálfmaraþon vegalengd er ræst. Þeir þátttakendur sem koma í mark eftir að þrjár klukkustundir eru liðnar fá ekki skráðan tíma.
  5. Þátttakendur skulu hafa hlaupnúmerið sýnilegt að framan, allan tímann á meðan hlaupinu stendur. Hlaupanúmer er skráð á ákveðinn þátttakanda og gildir eingöngu fyrir þann einstakling. Frávik frá þessu ógildir tímatöku.
  6. Þátttakendur bera ábyrgð á tímatökuflögunni sem þeim er úthlutað í leigu. Hver þátttakandi má einungis hafa eina flögu. Þátttakendur bera einnig ábyrgð á að flagan sé skráð á þeirra nafn, að hún sé eingöngu notuð af þeim sem skráður er fyrir flögunni og skila henni að loknu hlaupi til starfsmanns hlaupsins . Til þess að fá tímatöku verður að festa flöguna á skóinn. Ef það er ekki gert gildir: „engin flaga = enginn tími". (Sjá nánar hér)
  7. Ekki er heimilt að skipta um vegalengd á hlaupdegi. Sá sem hleypur aðra vegalengd en skráning segir til um er ekki inni í tímatöku hlaupsins og er ekki gildur þátttakandi.
  8. Aldurstakmörk eru í vegalengdum Miðnæturhlaups Suzuki. Hálfmaraþon 21,1 km er fyrir fimmtán ára og eldri. 10 km hlaup er ætlað fyrir 12 ára og eldri og er ekki æskilegt fyrir yngri börn. Fólk á öllum aldri getur skráð sig í 5 km.
  9. Þátttakendur skulu kynna sér hlaupaleiðir og eingöngu hlaupa eftir þeirri braut sem skilgreind hefur verið af hlaupahaldara. Hlaupabrautin er eingöngu ætluð keppendum. Ekki er heimilt að fylgja hlaupurum gangandi, hlaupandi, á hjóli eða öðrum farartækjum. Það er á ábyrgð þátttakenda að vísa frá þeim sem vilja fylgja. 
  10. Reykjavíkurmaraþon áskilur sér rétt til að vísa þeim frá, sem eru á hjóli eða öðrum farartækjum á hlaupabrautinni eða nálægt hlaupandi þátttakendum.
  11. Þátttakendum er óheimilt að þiggja þjónustu af öðrum en starfsmönnum hlaupsins í formi matar,drykkja eða líkamslegs stuðnings nema í neyð. Þá ber að tilkynna slíkt til hlaupstjóra.
  12. Þátttakendum er ekki heimilt að hafa meðferðis hunda eða önnur gæludýr í hlaupinu.
  13. Þátttakendum er ekki heimilt að hafa meðferðis kerrur eða vagna.
  14. Ekki er heimilt að taka þátt í hlaupinu á vél-, eða rafmagnsknúnum farartækjum, reiðhjóli, hlaupahjóli, línuskautum, hjólabretti, skíðahjólum eða handdrifnu hjóli (hand-cycle).
  15. Þátttakendur með stafgöngustafi skulu stilla sér upp aftast í upphafi hlaups.
  16. Þátttakendur í hjólastól skulu haka við það í skráningarferlinu að þeir taki þátt í hlaupinu í hjólastól og kynna sér upplýsingar fyrir fatlaða þátttakendur hér.
  17. Þátttakendur í hjólastólum og með önnur hjálpartæki skulu af öryggisástæðum vera aftast í upphafi hlaups.
  18. Þátttakendur skulu sýna öllum starfsmönnum hlaupsins kurteisi og fara eftir leiðbeiningum og fyrirmælum þeirra.
  19. Þátttakendur skulu sýna öðrum hlaupurum tillitsemi, og hafa í huga almennar umferðareglur.
  20. Þegar þátttakendur hafa lokið hlaupi er þeim ekki leyfilegt að fara aftur út á braut til þess að hlaupa með öðrum þátttakendum.

Ölum ábendingum sem þátttakendur vilja koma á framfæri er hægt að koma til skila á netfanginu  This email address is being protected from spambots. You need JavaScript enabled to view it. .

Um Reykjavíkurmaraþon

Reykjavíkurmaraþon var stofnað árið 1984.  Frá 2003 hefur Reykjavíkurmaraþon verið í umsjón Íþróttabandalags Reykjavíkur (ÍBR) sem eru samtök íþróttafélaganna í Reykjavík.  Á vegum Reykjavíkurmaraþons eru árlega haldin þrjú hlaup: Reykjavíkurmaraþon Íslandsbanka, Laugavegurinn - Ultra Maraþon og Miðnæturhlaup Suzuki. Reykjavíkurmaraþon fagnaði 30 ára afmæli árið 2013.